秋高气爽食松茸 _健康小知识

【秋高气爽食松茸】本文转自：新民晚报

文章图片
文并图/沈一珠
深秋辰光，菌菇正香；煎炸烧烤，松茸为王。
假使讲，秋天是吃菌菇的好辰光，搿末，松茸就是秋天菌菇里的王。从前，松茸侪是野生的，一年就长迭能一逮，又只长勒红松林搭仔黑松林里向；除脱专家，一般人也勿晓得伊迓勒啥地方，所以，老稀奇；而如今，能够改天换地的人类已经寻着了人工栽培的方法，松茸迭种物事就有了两种境界：野生的，还是贵得野豁豁；家生的么，也就随便吃吃了。当然咯，可以肯定的是，出啥钞票，吃啥味道。
松茸比较好的状态是头上那把“伞”像花苞一样，还没有打开；伞柄也是粗壮、结实的；迭个辰光，香味道顶顶浓；而眼门前迭一小盒赤松茸，花苞已半开，香味道应该散脱勿少了；晓得伊是从黑龙江翻山越岭来到上海，又加上疫情年里，更勿晓得要经过多少趟核酸检测，真真要谢谢天，谢谢人。
搿天，一小盒赤松茸8只，一半用来烧饭；另外一半面拖，或者叫伊天妇罗。
松茸饭：松茸4只，用厨房用纸沾着水，轻轻交拿表面的龌龊弄清爽，像削铅笔一样拿带泥的根部以及发黑变质的部分削脱，汏清爽的松茸切成小块；橄榄油烧热，松茸倒下去，勿用翻，等香味出来后，加料酒、生抽、盐以及适量清水烧开，笃一歇就拿松茸撩出，用适量松茸汤水加入淘好的适量大米，饭烧好后，拿松茸铺勒饭表面，再焖5分钟左右，盛出来之前，拿饭搭仔松茸拌拌匀。好吃得来，滑糯的米饭里有鲜洁的松茸香气。
面拖松茸：淀粉里加只蛋，加点料酒，加一点点盐，调成薄糊；松茸竖起来对半切，或者切成三片；先蘸少许干淀粉，再摆勒蛋糊里拖一拖，入热油炸到两面金黄捞出，吸干油，趁热蘸香醋吃，味道老好。